இந்துசமய சிற்பங்கள்

நடராஜர் சிலை

• இந்து சமயத்திற்குரிய சிலைகளுள் ஒன்றான நடராஜர் சிலை முழுமுதற் கடவுளான சிவனது (ஈஸ்வரனது) தாண்டவ நடன அமைப்பை வெளிப்படுத்தி நிற்கிறது.
• பொலநறுவை 1ம் சிவ ஆலயத்தில் கிடைக்கப் பெற்ற இந்த நடராஜர் சிலை கொழும்பு அரும்பொருட்சாலையில் வைக்கப்பட்டுள்ளது.
• இது கி.பி. 12 ஆம் நூற்றாண்டைச் சேர்ந்ததாகக் கருதப்படுகின்றது.
• வெண்கலத்தை ஊடகமாகப் பயன்படுத்தி தனிநிலைச் சிற்பமாக உலோகத்தை வார்த்து மிகப் பழமை வாய்ந்த நுட்ப முறையைக் கொண்டு நிர்மாணிக்கப்பட்ட உன்னதமான படைப்பாகும்.
• சமநிலைத் தன்மை பேணும் விதத்தில் சிற்பக் கோட்பாடுகளுக்கிணங்க தீச்சுடர் வளையத்தின் மத்தியில் வேகமான நடனத்தில் ஈடுபட்டிருக்கும் விதத்தை உயரிய கலைப்பாணியுடன் காட்டப்பட்டுள்ளது.

இச்சிலையின் பாதங்கள் மற்றும் கைகளால் காட்டப்படும் முத்திரைகளும் குறியீடுகளும் வருமாறு

• நான்கு கரங்களைக் கொண்டது.
• உடுக்கை (மேளம்) ஏந்திய மேல் வலக்கரம் பிரபஞ்சத்தின் படைப்பை குறித்து நிற்கின்றன.
• அக்கினி ஏந்திய மேல் இடக்கரம் அழித்தலையும் குறித்து நிற்கின்றன.
• தூக்கிய இடது கை காத்தலை குறித்து நிற்கின்றன.
• பூமியை நோக்கியிருக்கும் வரத ஹஸ்த முத்திரையுடன் கூடிய வலது கை அருளலையும் குறித்து நிற்கிறது.
• நீண்ட கேசத்தினுள் உள்ள கங்காதேவி (கடற்கன்னி ) உருவம் கங்கை நதியைக் குறிக்கிறது.
• தலை கிரீடத்தில் அணிந்துள்ள பிறைச் சந்திரன், கங்காதேவி, நாகம், மனித மண்டை ஓடு என்பன காட்டப்பட்டுள்ளன.
• முழுஉருவமும், தீச்சுவாலை பரப்பும் வில் வளைவொன்றினுள் அமைந்துள்ளது. பத்மா சனமொன்றின் மீது அமைந்துள்ளது. பத்மாசனமொன்றின் மீது அமைந்துள்ள இணைக்கப் பட்ட மகர வாய்களின் மூலம் இவ்வில் வளைவு ஆக்கப்பட்டுள்ளது.
• இளமையும் துடிப்பும் காட்டும் இச்சிலையில் வலக்காதில் ஆண் அணியும் குழையும் இடக்காதில் பெண் அணியும் தோடும் காட்டப்பட்டுள்ளன. கழுத்தில் ஆபரணங்கள் அணிந்து இருப்பது வெளிப்படுத்தப்பட்டுள்ளது.

பார்வதி சிலை (சிவகாமசுந்தரி சிலை)

• இச்சிலை சிவபெருமானின் பத்தினியான பார்வதி தேவியைக் குறிப்பதாகும். பர்வதத்தில் (மலையில்) பிறந்ததால் பார்வதி எனப்பட்டதாகக் கூறப்படுகிறது. சிவபெருமானின் பத்தினி (மனைவி) ஆனதால் சிவசக்தி, சிவகாமசுந்தரி எனும் பெயர்களாலும் குறிப்பிடப் படுகின்றன.
• பொலநறுவை 5 ஆம் இலக்க சிவனாலயத்தில் கண்டெடுக்கப்பட்டது. இது தற்போது பொலனறுவை நூதனசாலையில் காட்சிக்கு வைக்கப்பட்டுள்ளது. பெண்மையின் நளினம் வெளிப்படும் வகையில் உயர்வான சிற்பப் பண்புகளுடன் வார்க்கப்பட்ட சிலையாகும்.
• கி.பி. 12 ஆம் நூற்றாண்டுக்குரியது. இந்த வெண்கலப் படிமம், வெண்கல ஊடகத்தைப் பயன்படுத்தி உருவாக்கப்பட்ட வார்ப்புச் சிலையாகும்.
• வலது கை கடக ஹல்த முத்திரையைக் காட்டி நிற்கிறது. இடது கை லோக ஹஸ்த முத்திரையுடன் கீழே தொங்கவிடப்பட்டுள்ளது.
• தலையில் நீண்ட கிரீட (மகுட) அலங்காரம், உடலை ஒட்டிய ஆடைகள், அலங்காரமான ஆபரணங்கள் சிலையின் அழகை மேம்படுத்திக் காட்டுகின்றன.
• நளினம், மென்மை, அழகு வெளிப்படும் விதத்தில் திரிபங்க (மூவளைவு) நிலையில் அழகாக அமைக்கப்பட்ட இச்சிலை மேன்மையான ஒரு படைப்பாகக் கொள்ளப்படுகிறது.

விநாயகர் சிலை

• இப்படிமம் கி.பி. 12 ஆம் நூற்றாண்டைச் சேர்ந்தது எனக் கருதப்படும். இது ஒரு பிள்ளையார் சிலை ஆகும். பொலநறுவை 5 ஆம் இலக்க இந்து ஆலயத்தில் கண்டெடுக் கப்பட்ட ஓர் இந்து சமயச் சிலையாகும்.
• வெண்கல ஊடகத்தைப் பயன்படுத்தி வார்ப்பு முறையில் நிர்மாணிக்கப்பட்ட சிலையாகும்.
• சிவபெருமானினதும் பார்வதி அம்மாளினதும் மூத்த மகனே விநாயகர் ஆவார் எனக் கருதப்படுகிறது.
• யானை முகத்தையும் பெரிய உதரத்தையும் கொண்ட பிள்ளையார் புத்திக்கும் எழுத்து அறிவுக்கும் அதிபதியாவதுடன் விக்கினங்களைப் போக்குபவராகவும் கருதப்படுகிறார்.
• நான்கு கரங்களை உடையவர். மேல் (பின்பக்க) வலக் கையில் கோடரியும், மேல் (பின்புற ) இடக் கையில் அரிச்சுவடியும், முன்பக்க வலக் கையில் உடைந்த தந்தமும், முன்பக்க இடக்கையில் மாங்கனி ஒன்றையும் ஏந்தி நிற்பது காட்டப்படுகிறது.
• தாமரை மலரின் மத்தியில் ராஜாசனப்பாங்கில் நிருமாணிக்கப்பட்டுள்ளது.

காரைக்கால் அம்மையார் (படிமம்)

• காரைக்கால் அம்மையார் எனப்படும் இச்சிலை பொலநறுவைக் காலத்தைச் சேர்ந்த இந்து சமய சிலைகளில் ஒன்றாகும்.
• பொலநறுவை இல 5 ஆம் சிவாலயத்தில் கண்டெடுக்கப்பட்டு தற்போது அநுராதபுரம் நூதனசாலையில் வைக்கப்பட்டுள்ளது.
• சிவபெருமான் மீது கொண்ட மிகுந்த இறைபக்தி காரணமாக தமது இயல்பான பேரழகெல்லாம் நீங்கி, என்பு வடிவம் தரும்படி வரம் கேட்டு மெலிந்து எலும்புந் தோலுமாக மாறிய ஒரு பெண்ணையே இது குறித்து நிற்கிறது.
• மெலிந்த விகாரமான உடலுடன் அமர்ந்து கைகளினால் தாளத்தை இசைப்பது காட்டப்பட்டுள்ளது.
• இச்சிலை இலங்கையின் இந்து சமயக் கலைப் படைப்புக்களுள் சிறப்பாக கற்பனை வெளிப்பாட்டைக் கொண்ட ஒரு படைப்பாகக் கருதப்படுகின்றது.
• கி.பி. 12 ஆம் நூற்றாண்டைச் சேர்ந்ததாகக் கருதப்படும் இச்சிலை வெண்கலத்தில் வார்த்தல் நுட்ப முறையில் ஆக்கப்பட்டுள்ளன.

சுந்தரமூர்த்தி நாயனார்

• இந்த வெண்கலச் சிலை சுந்தரமூர்த்தி நாயனார் எனும் சிவ பக்தனைக் குறிக்கின்றது.
• பொலனறுவைக் காலத்தில் கி.பி. 11 ஆம் நூற்றாண்டைச் சேர்ந்த ஒரு இந்து சமயச் சிலையாகும்.
• பொலனறுவை 5 ஆம் சிவாலயத்தில் கண்டெடுக்கப்பட்ட இது தற்போது கொழும்பு அரும்பொருட்சாலையில் காட்சிக்கு வைக்கப்பட்டுள்ளது.
• இவர் சைவசமயத்திலுள்ள அறுபத்தி மூன்று குரவர்களில் ஒருவராவார். இவர் சிவபெருமான் மீது தேவாரங்களை இயற்றி ஆலயம் ஆலயமாகச் சென்று அவற்றைப் பாடியுள்ளார்.
• மங்களகரமான வஸ்திரங்கள், ஆபரணங்கள் அணிந்து மணவாள கோலத்தில் அமைக்கப் பட்டுள்ளது.
• இளமை , எடுப்பான தன்மையுடன் அழகுற அமைந்த திரிபங்க (மூவளைவு) நிலையில் உள்ள பத்மாசன பீடத்தின் மீது அமைந்த ஒரு சிலையாகும்.
• மனித உடற் பாகங்களை தத்து ரூபமாக அங்க இலட்சணங்களுடன் இயற்கையாக தோன்றும் விதத்தில் அமைக்கப்பட்ட ஒரு உலோகச் சிலை எனக் கருதப்படுகிறது.
• கைகளால் கடக ஹஸ்த முத்திரை காட்டப்படுகின்றது. பத்ர பீடம் மீது பொருத்தப்பட்ட வட்டமான தாமரை மலர் மீது மூவளைவு நிலையில் உள்ள ஒரு நிற்கும் நிலைச் சிலையாக இது வடிக்கப்பட்டுள்ளது.
• வெங்கல ஊடகத்தால் திண்ம வார்த்தல் நுட்ப முறையைப் பயன்படுத்தி இருக்கும் இது இந்து கலை நிருமாணங்களிடையே விசேடமான கலை இயல்புகளை வெளிக் காட்டும் நிருமாணிப்பாகக் கருதப்படுகின்றது.

பயிற்சி வினாக்கள்